لا تتعجب

ما بين يأسا ويأسا ابحث عنك
لا تتعجب... فقسوتك حضنا دافئا يضمنى
لا تتعجب ... لن احاول الفرار من قبضتك فأنت منى
لا تتعجب .... لن يزيد من عمق جرحى سياطك الملتهبه التى تدمى اضلعى
لاتتعجب
اغضب ... فأنا اجد فى غضبك ما يوسينى
فلتغضب.. قد لا اجد فى عينيك نفسى لكن اجد فى دموعى ما يطهر جروحى
فلا تغضب عندما اهرب منك ....... فحتما ساعود لابحث بين جلاديك عما يؤنس وحدتى
انشر ملح سخريتك من ضعفى فى جراحى
اطلق العنان لكلماتك تحرق ادمعى
اجعلى منى كيانا منتهيا بين يديك
فلن اغضب ولن اغضب فانتقائك للحظات التى تصرعنى خلالها يبهرنى
يبهرنى غرسك لانياب قسوتك فى قلبى عند احتياجه لدفئ احضانك
انك حقا تبهرنى

اول خربشة

إن حد يفتح لحد تاني قلبه كأنه بلكونة بيتهم اللي عالبحر.. و يقعد و ياخد راحته كأنه فعلا بيت أبوه اللي عالبحر
هيقعد يشخبط ع الحيطان.. و يقلب الكراسي.. و يطلع قطن الخدديات.. و يفَََّتّح ضرف الدواليب.. مش مشكلة, ما هّو اللي هيقعد في الهيصة دي كلها.. يعني إنت- كصاحب البيت الأصلي- أساسا بتبقى مبسوط إنه لاقي راحته عندك.. و بعبطك تبتدي تفكر إنكو ممكن تفتحوا البيتين على بعض.. على أساس إن إنت كمان تدخل تِمَدد عنده كأنك فى بلكونة بيت أبوك اللي عالبحر إنت كمان ..
بس هو بقى.. هيطلع ندل قوي و يقولك سلامو عليكو, أصلي معرفتش آخد راحتي عندكو.. يعني..
هيمشي.. بس هتكتشف إنه ساب حتة من روحه في المكان.. هتقعد تدور زي المجنون على أي حاجة من ريحته.. حاجة كده تقدر تمسكها في إيدك و تعيط عليها
بس إنت مش هتلاقي غير شبح الروح دي..
شوية و تحاول تنسى, و تبتدي تحاول توضب في المكان عشان يرجع زي الأول تاني.. بس هتكتشف إن الشخابيط اللي عالحيطان أعمق و أكتر من إنها تتشال.. ولا الكراسي راضية تتعدل,ولا الضرف راضية تتقفل.. و قطن الخدديات اتفرفت ميت حتة و حبة منه طاروا وقعوا في البحر .. ساعتها هتحس إنك غلبان قوي.. و إنك متعَّور قوي

هو انت متغاظ عشان حاسس إن كله طلع وهم
ولا زعلان عشان قلبك إتنعكش؟
في أي الحالتين.. نضّفلي مخك بقى و ماتكررش غلطك مرتين.. ماتفتحش قلبك لكل من هب و دب ياخد له تعسيلة فيه.. واذا خلي بالك بقول "إذا" لقيت حد إحتمال إنه يكون أهل إنه يوضب النعكشة اللي جوَّة.. برضه متسيبهوش ياخد راحته
قوي.. مش يمكن كمان شوية هو كمان يزهق من التوضيب؟!
و نداء أخير للطرف التاني.. يا ريت لو إنت ناوي تمشي قريب تقعد بأدبك بقى.. و بلاش شغل تانية حضانة بتاعك ده.. يعني الأمور كده هتبقى أسهل كتير